:: رابطة الاقصر | بوابات الاقصر | الاقصر الآن ::
 
 
 

2011/03/19

ميدان التحرير
 

انت والأسفلت واحد

والرصيف من كل ناحيه

بيحمى ضهرك

مش كفايه انك لأو مره

بتحارب بصوتك

مش كفايه انك بتقتل خوفنا

وتعاند سكوتك

وماعدش ينفع

انك تسلم للعدو روحك

وانك تفادى دنيتى بموتك

طلّع حروفك

زلزل كيان اللى رقد

فى القصر

واثبت مكانك

لما ييجى النصر

وموت ..

عشان تبقى ابتسامة مصر

 

مين اللى أعلى

انت ..

أم صوت الهتاف

مين اللى أقرب

كلمتك ..

ولا العدو اللى ف لحظة

خاف

النيل مابيخبيش سنينه للجفاف

تلاتين سنه

يا سنين عجاف

واحنا بنشرب فى المرار

ونقول رضا ليل المهانه بنحسبه

لحظة قضا

ونبل صوابعنا بريق ناشف

ونبكى حظنا وضيق الفضا

وانت بتحضن خطوتك أرض الميدان

انت اللى واقف ديدبان ..

فو الكتاف

وانت بتقرا الإعتراف

اللى سمع صوتى سمع

واللى ماعاشش ثورتى

عمره ما شاف

 

شخبط على أرض الميدان

همك

واكتب بدمك

انك نويت تحيا

دم النبى يحيى

فى رقبة الساكتين

دم اللى باعك ..

صار مباح لإيديك

اكتب بصوتك ع الرصيف

حنعيش

من غير رغيف العيش

لكن بصوت ..

بيزلزل الملايين

انت اللى حاضر

وكلهم غايبين

انت اللى باقى

وكلهم رايحين

اكتب بداية .. ملامح التغيير

واثبت فى قلب الميدان

واثبت على التحرير

التعلقيات

يجب تسجيل الدخول أولا حتي تتمكن من التعليق

تسجيل دخول || للتسجيل اضغط هنا

العودة الى البوابة